 |
 |
|
|
          إضافة للصفحات المفضلة روابط نسخة للطباعة إخبار اصدقائك بالامر قائمة المراسلة منتديات النقاش |
تيا تكتب في مدونتها عن "وقفة بنات" بين ساعات الشغل والتعليم والاجتماعيات.. كنت اسرق الدقايق من هون وهون.. عشان اقرا كتاب "وقفة بنات" إصدار جمعية أصوات- نساء فلسطينيات مثليّات. كتاب.. بتأمل وبتمنى يوصل لكل شرائح المجتمع بالبلاد.. كتاب عشان لما المتخبّط بهويته الجنسية يقرا فعلا تحس/يحس انو مش لحاله بالعالم.. وانو التجارب اللي منمر فيها كمثليات ومثليين تقريبا متشابهة.. تقريبا. "الحسن صبي" والكْرَش (الاعجاب) الأول بالمعلمة.. الوقوع بحب الصديقة المفضلة.. التنكر للهوية.. الهروب من المحيط لتعوّدنا عليه (او ما تعوّدنا) وبكتير حالات بالقصص الموجودة بالكتاب كان الهروب لتل أبيب. قصتين او تلاتة عن الروح اللي بالجسد الغلط.. حسّيت شوي في تهاون اكتر مع الترانس من قِبَل الاهل.. واللي قليل موجود عند أهالي المثليين.. اللي هني بالجسد الصح وميولهن الجنسي للجندر ذاته. زي اللي بقدرو يحطّو الحق على حدا.. على القدر.. على الجينات.. في سبب يتمسكو فيه. بينما عند الفئة التاني مش دايما بيلاقو سبب.. فالموضوع راح يضل يؤرقهن.. راح تكون الحالة أصعب للهضم.. بدون اجوبة لأسئلة وتساؤلات بالنسبة النا احنا المثلييات والمثليين صارت تقريبا محلولة وجزء من المُسلّمات. وعلى سيرة المُسلّمات والتساؤلات والأسئلة.. "الهوية الدينية" لعبت دورها.. كعامل سلبي او ايجابي مش عارفة.. في غالب الأحيان كان الها تأثير سلبي على نفسية الراوية لما تكتشف انو المثلية الجنسية مش مقبولة بالكتب "المقدسة".. بس بشي مرحلة بتربط انو الله محبة وتسامح وهيك بتشرّع المثلية لحالها.. منيح.. منيح.. طالما متسامحة مع حالها وملاقي المعادلة تكون مثلية ومؤمنة وزابطة معها..تحياتي الها.. امّا.. بالنسبة الي الدين والكتب "السماوية" و"المقدسة" ما هي الا اجوبة مؤقتة لنهاية مجهولة.. واحنا بطبيعتنا منخاف من المجهول فمنفضل نتمسك بشي عقيدة.. وعادة بتكون هي نفسها العقيدة اللي خلقت معنا.. اللي ورثولنا اياها الاجداد والاسلاف.. بس هاد الموضوع مش موضوعي اسا
عندي ايمان انو بشي مرحلة راح نوصل.. راح نقدر.. راح نكون.. بس لازم دايما نتزكر القاعدة الأساسية اللي عملنا وطموحاتنا بترتكز عليها واللي هي الإنسانية.. الانسانية اللي بتولّد المنطق.. اللي بتولّد القدرة على التفاهم.. اللي لازم تخلينا نسامح بعض.. و أهم اشي.. أهم أهم اشي.. نحب بعض |
| Powered by COMRAX® |
Copyright © 2005, ASWAT. All rights reserved. Read the Terms of Use (شروط ألإستخدام) of ASWAT's website. No part of this website may be reproduced by any means without the prior written permission of ASWAT. |